Өткен сенбі, жексенбі күндері Нұр-Сұлтан қаласында ауыл шаруашылығы өнімдерінің жәрмеңкесі өтті. Оған «Жамбыл жерінен-Нұр-Сұлтан төріне» атты азық-түлік тиелген автокеруен аттанған болатын.
Өңіраралық ынтымақтастықты арттыруға бағытталған шараға Талас ауданының кәсіпкерлері де өз үлестерін қосты. Атап айтсақ, 1,5 тонна қой, 1 тонна сиыр, 500 келі жылқы етімен қатар, 200 келі құрт-ірімшік, 300 литр сүт өнімдері жеткізілді. Жәрмеңкеге аудандағы «Құлтай-Шахан», «Дүйсенбі», және өзге шаруа қожалықтарының өнімдері қойылды.
— Тауарларымыз нарық бағасынан 15-20 пайызға төмен саудаланды. Елорда тұрғындарының біздің сапалы, табиғи таза өнімдерімізге сұранысы жоғары болды. Сенбі, жексенбі күндері ұйымдастырылған жәрмеңкеде өнімдерімізді жақсы өткіздік,-дейді аудан әкімі аппаратының ұйымдастыру — инспекторлық бөлімінің бас инспекторы Медет Үрістенов.
Жалпы, аудандағы кәсіпкерлер Тараз қаласында ұйымдастырылатын ауыл шаруашылық өнімдерінің жәрмеңкесіне де тұрақты қатысып, өнімдерін жергілікті тұрғындарға ұсынуда. Мұнда да тұтынушылардың таластық өнімдерге деген сұранысы жоғары.
Aulieatanews, Талас ауданы.
