МЕРКІ АУДАНДЫҚ МӘСЛИХАТЫНЫҢ ДЕПУТАТТЫҒЫНА «ӘДІЛЕТ» ПАРТИЯСЫНАН №10 БІР МАНДАТТЫҚ САЙЛАУ ОКРУГІ БОЙЫНША КАНДИДАТ
Қырғызбаева Венера Әміреқызының
Сайлауалды Бағдарламасы
ӨМІРБАЯН
Мен, Қырғызбаева Венера Әміреқызы, 1976 жылғы 28 маусымда Жамбыл облысының Меркі ауданында дүниеге келдім.
1983-1993 жылдары И. Трубицын атындағы №17 жалпы орта білім беретін мектепте оқыдым. 1993-1998 жылдары М. Х. Дулати атындағы Тараз мемлекеттік университетінде білім алдым. 2001-2003 жылдары Қазақ мемлекеттік қыздар педагогикалық институтында оқып, «Валеология және биология» мамандығы бойынша оқуымды аяқтадым.
Еңбек жолымды 2000 жылғы 2 қазанда Меркі ауданындағы №44 орта мектепте валеология пәнінің мұғалімі болып бастадым. Осы мектепте 2000 жылғы 1 қарашаға дейін жұмыс істедім. 2000-2012 жылдары Меркі ауданындағы Владимир Савва атындағы орта мектепте валеология пәнінен сабақ бердім.
2012-2015 жылдары Т.Қожакеев атындағы №39 жалпы орта білім беретін мектеп-гимназияда әлеуметтік педагог, 2015-2025 жылдары директордың ғылыми ісі жөніндегі орынбасары қызметін атқардым.
2025 жылғы 3 желтоқсаннан бастап №48 жалпы орта білім беретін мектептің директоры қызметін атқарып келемін.
Білім беру саласындағы еңбегім үшін 2018 және 2020 жылдары Жамбыл облысы әкімдігінің білім басқармасының, 2020 жылы Қазақстан Республикасы Білім және ғылым министрлігінің Құрмет грамоталарымен марапатталдым.
САЙЛАУАЛДЫ БАҒДАРЛАМА
Құрметті ауыл тұрғындары!
Ауылымызды дамыту, тұрғындардың жайлы әрі қауіпсіз өмір сүруіне жағдай жасау – ортақ мақсатымыз. Осы мақсатпен №10 сайлау округі бойынша «Әділет» партиясының атынан Меркі аудандық мәслихатының депутаттығына кандидатурамды ұсынып отырмын. Мен үшін тұрғындардың сенімі – үлкен жауапкершілік. Депутат болып сайланған жағдайда, өкілеттігім мен бюджет мүмкіндіктері шеңберінде мына бағыттарға басымдық беремін:
- Ауызсу жүйесін жаңғырту
Меркі бекеті аумағындағы ауызсу жүйесін жаңғырту мәселесін жауапты мекемелер алдында көтеремін. Су құбыры желілерінің жағдайын зерделеу, қажетті жобалық құжаттаманы әзірлеу және жаңғырту жұмыстарын кезең-кезеңімен қаржыландыру жөнінде ұсыныстар енгіземін. Тұрғындардың ауызсу сапасы мен тұрақты берілуіне қатысты өтініштерінің тиісті ұйымдармен қаралуына ықпал етемін.
- Жаяу жүргіншілерге қауіпсіз жағдай жасау
Меркі бекетінде жаяу жүргіншілерге арналған тротуарлар салуға ықпал етемін. Тұрғындар жиі қатынайтын бағыттарды, мектепке баратын балалардың, қарт адамдардың және жүріп-тұруы қиын азаматтардың қажеттіліктерін ескеріп, бірінші кезекте тротуар қажет учаскелерді айқындауға бастамашы боламын. Тиісті жұмыстарды жоспарлау және қаржыландыру мүмкіндіктерін қарастыру жөнінде ұсыныстар енгіземін.
- Аспалы көпір құрылысын аяқтау
Меркі бекетіндегі теміржолдағы аспалы көпір құрылысын аяқтау мәселесін тиісті органдар алдында көтеремін. Жобаның қазіргі жай-күйін, қажетті жұмыстар мен қаржыландыру мүмкіндіктерін жауапты ұйымдармен бірлесіп талқылауға бастамашы боламын. Көпірдің тұрғындардың қауіпсіз жүріп-тұруына қолайлы болуына және құрылыс жұмыстарының сапасына қатысты мәселелерді назарда ұстаймын.
Құрметті жерлестер! Ұстаздық жолды таңдаған адам үшін бала қауіпсіздігі, отбасы амандығы және қоғамның болашағы қашанда маңызды. Білім беру саласында ұзақ жылдар еңбек ете жүріп, әрбір баланың сапалы білім алуымен қатар, қауіпсіз ортада өсіп-жетілуі қаншалықты қажет екенін терең түсіндім. Сондықтан менің сайлауалды бағдарламамдағы міндеттер тұрғындардың күнделікті өмірімен, әсіресе балалар мен отбасылардың қауіпсіздігімен тікелей байланысты.
Меркі бекетінің тұрғындары үшін сапалы ауызсу, қолайлы жаяу жүргіншілер жолы мен теміржол өткеліндегі көпірдің аяқталуы – кейінге қалдыруға болмайтын маңызды мәселелер. Бұл міндеттердің шешілуі ауылдағы өмір сапасын жақсартып қана қоймай, тұрғындардың ертеңгі күнге деген сенімін де нығайтады.
Мен алға қойған міндеттерімді жүзеге асыруда тұрғындардың пікірін тыңдауды, әрбір ұсынысты назарға алуды және тиісті мекемелермен жүйелі жұмыс жүргізуді басты қағида санаймын. Әрбір мәселенің артында адам тағдыры, отбасының тыныштығы мен баланың қауіпсіздігі тұрғанын ұмытпауымыз керек.
Бізді біріктіретін ортақ құндылық – туған жеріміздің болашағы. Ауылдың көркеюі үшін жасалған әрбір игі іс келер ұрпақтың игілігіне қызмет етуі тиіс. Мен осы ұстанымды басшылыққа алып, Меркі бекетінің өзекті мәселелерін аудандық мәслихат деңгейінде көтеруге және олардың шешілуіне депутаттық өкілеттігім шеңберінде атсалысуға ниеттімін.
Сіздердің сенімдеріңіз бен қолдауларыңыз мен үшін маңызды. Өйткені, мен ауыл мүддесі үшін қордаланған мәселелердің шешілуіне депутаттық жұмыс арқылы үлес қосқым келеді. Ауылымыздың дамуы үшін бірге әрекет етейік!
Құрметпен, Венера Қырғызбаева!
Меркі аудандық мәслихаты депутаттығына кандидат В.Қырғызбаеваның сайлау қорының қаражатынан төленді.
