Жамбыл облысында синтетикалық есірткінің заңсыз айналымына қарсы күрес бағытындағы жұмыстар жалғасуда. Кезекті жедел-іздестіру іс-шаралары барысында тәртіп сақшылары аса ірі көлемдегі есірткі заттарын сақтап, таратумен айналысты деген күдікпен шетел азаматын қолға түсірді, деп хабарлайды «Aulieatanews» ақпараттық агенттігінің тілшісі.
Облыстық полиция департаментінің мәліметінше, арнайы операция кезінде 29 жастағы азамат ұсталған. Жеке тінту барысында оның жанынан ақ түсті ұнтақ тәрізді зат салынған бірнеше түйіншек табылып, тәркіленген. Сондай-ақ оқиға орнына жақын аумақтан дәл осындай орамалар анықталған.
Кейін күдіктінің уақытша тұрып жатқан мекенжайында жүргізілген тінту жұмыстары барысында есірткіге ұқсас зат салынған тағы да көптеген түйіншек тәркіленді. Сараптама қорытындысы олардың құрамында «Альфа-PVP» синтетикалық есірткісі бар екенін көрсетті.
Тергеу мәліметтеріне сәйкес, тәркіленген тыйым салынған заттың жалпы салмағы 59 грамнан асқан. Мамандардың алдын ала бағалауынша, оның қара нарықтағы құны 2,7 миллион теңгеден жоғары.
Алдын ала анықталған деректер бойынша, күдікті заңсыз табыс табу жөніндегі ұсынысты әлеуметтік желі арқылы алған. Ол есірткі заттарын Алматы қаласынан жеткізіп, Тараз аумағында жасырын орындарға қалдыру арқылы өткізуді көздеген. Алайда полиция қызметкерлерінің жедел әрі үйлесімді әрекетінің нәтижесінде оның заңсыз жоспары жүзеге аспай қалды.
Қазіргі уақытта аталған дерек бойынша Қазақстан Республикасы Қылмыстық кодексінің 297-бабының 3-бөлігіне сәйкес сотқа дейінгі тергеп-тексеру амалдары жүргізілуде. Күдікті уақытша ұстау изоляторына қамалып, оның өзге де қылмыстық әрекеттерге қатысы бар-жоғы анықталуда.
Құқық қорғау органдары есірткінің заңсыз айналымына қарсы күрес өңірдегі қоғамдық қауіпсіздікті қамтамасыз етудің маңызды бағыты болып қала беретінін атап өтті.
