Тараздың мәдени-рухани өміріне жаңа серпін беретін ауқымды жоба қолға алынды. Көне шаһарда заманауи талаптарға сай жабдықталған, 1300 көрерменге арналған Салтанат сарайының құрылысы басталды. Жаңа нысан өңірдегі мәдени іс-шараларды өткізу мүмкіндігін кеңейтіп қана қоймай, балалар мен жастардың шығармашылығын дамытуға, өнер ұжымдарының жұмысын жандандыруға жол ашпақ, деп жазады «Aulieatanews» ақпараттық агенттігінің тілшісі.
Жаңа мәдениет ошағы «Балауса» (14) шағын ауданында бой көтереді. Нысанның іргетасына капсула салу рәсіміне Жамбыл облысының әкімі Ербол Қарашөкеев, облыстық және қалалық мәслихаттардың өкілдері, қоғамдық және ардагерлер кеңестерінің мүшелері, зиялы қауым өкілдері мен мәдениет саласының мамандары қатысты.
Салтанат сарайының құрылысына 5 гектар жер бөлінген. Жалпы аумағы 13 мың шаршы метр болатын кешеннің жобалық құны 18,5 миллиард теңгені құрайды. Нысанды 2028 жылдың наурыз айында пайдалануға беру жоспарланып отыр.
Жоба аясында 1300 орынды көрермен залы, заманауи сахна, баспасөз орталығы, конференц-залдар, өнер үйірмелеріне арналған арнайы орындар және түрлі танымдық бағыттағы бөлімдер қарастырылған. Кешен заманауи жарық пен дыбыс жүйелерімен жабдықталып, мәдени шараларды жоғары деңгейде өткізуге мүмкіндік береді.
Жаңа сарайда концерттер мен театрландырылған қойылымдардан бөлек, шығармашылық кештер, көрмелер, мәдени форумдар, республикалық және халықаралық деңгейдегі іс-шараларды ұйымдастыруға жағдай жасалмақ. Бұл өз кезегінде Тараздың мәдени өмірін жандандырып, қала тұрғындарының өнер мен шығармашылыққа деген қызығушылығын арттыруға ықпал етеді.
Нысанның тағы бір маңызды бағыты – балалар мен жастар шығармашылығын қолдау. Мұнда жас өнерпаздардың қабілетін шыңдауға, түрлі үйірмелерге қатысуына және жаңа шығармашылық жобаларды жүзеге асыруына мүмкіндік беріледі. Өнер ұжымдары үшін де жаңа алаңның пайда болуы дайындық пен қойылымдарды ұйымдастыру мүмкіндігін кеңейтпек.
Құрылыс жұмыстарының басталуына арналған шарада Жамбыл облысының әкімі Ербол Қарашөкеев жаңа нысанның тарихи шаһар үшін маңызын атап өтті. Оның айтуынша, екі мың жылдан астам тарихы бар Тараздың тарихи келбетіне заманауи мәдени инфрақұрылым да сай болуы керек.
«Мемлекет басшысы Қасым-Жомарт Кемелұлы Тоқаев мәдениет пен өнерді дамытуға, халыққа қолайлы орта қалыптастыруға және елдің рухани әлеуетін арттыруға ерекше мән беріп келеді. Тарихы екі мың жылдан асатын Тараз үшін мәдениет пен өнердің орны әрдайым ерекше. Сондықтан көне шаһардың тарихи келбетіне сай заманауи мәдени инфрақұрылым қалыптастыру – маңызды міндеттердің бірі», – деді өңір басшысы.
Салтанат сарайының іске қосылуы қаланың мәдени тыныс-тіршілігіне ғана емес, оның туристік әлеуетіне де әсер етпек. Тараз – тарихи-мәдени мұрасы мол қалалардың бірі. Сондықтан заманауи мәдени нысандардың көбеюі туристерге ұсынылатын жаңа бағыттарды қалыптастырып, шаһардың тартымдылығын арттыруға мүмкіндік береді.
Бүгінде Таразда ең ірі концерттік зал 951 көрерменге арналған. 1980 жылы салынған ғимарат 2017 жылы қайта жаңғыртылған. Алайда уақыт талабына сай мәдени іс-шаралардың ауқымы кеңейіп, көрермендер саны артып келе жатқан жағдайда жаңа, сыйымдылығы жоғары әрі техникалық мүмкіндігі мол нысанға қажеттілік туындап отыр. Осы тұрғыдан алғанда жаңа Салтанат сарайының құрылысы – мәдениет саласы үшін маңызды қадам. Жаңа ғимаратта бір мезетте көп көрерменді қамтитын ірі концерттер мен форумдар өткізуге мүмкіндік туады. Сонымен қатар халықаралық және республикалық деңгейдегі мәдени жобаларды қабылдауға қажетті инфрақұрылым қалыптасады.
Іс-шара барысында Жамбыл облыстық мәслихатының төрағасы Абдалы Нұралиев пен Қазақстанның еңбек сіңірген қайраткері, «Мәдениет саласының үздігі» Асылхан Шүңіреков те сөз сөйледі. Мәдениет саласының өкілі жаңа нысан жас таланттардың шығармашылық жолын ашып, өңірдегі өнер ұжымдарының дамуына жаңа мүмкіндік беретініне сенім білдірді.
Жалпы, Салтанат сарайының құрылысы – Тараздағы мәдени инфрақұрылымды жаңғырту бағытындағы маңызды жобалардың бірі. Оның ауқымы мен функционалдық мүмкіндігі қала тұрғындарының мәдени демалысына жаңа жағдай қалыптастырып, өнер саласының дамуына тың серпін бермек.
Тарихы терең Тараздың рухани келбетін заманауи мәдени нысандармен толықтыру – уақыт талабы. Ал алдағы жылдары бой көтеретін жаңа Салтанат сарайы көне шаһардың мәдени өміріндегі басты орталықтардың біріне айналып, ел көлеміндегі маңызды өнер шаралары өтетін жаңа сахна болмақ.
Нысанды 2028 жылдың көктемінде пайдалануға беру жоспарланған. Демек, алдағы кезеңде Тараз тұрғындарын ғана емес, өңір қонақтарын да қабылдайтын жаңа мәдени орталықтың қалыптасуына жол ашылады. Бұл жоба қала инфрақұрылымын жетілдірумен қатар, өнер мен руханиятқа басымдық беретін қоғам қалыптастыруға бағытталған маңызды қадам болмақ.
