Ағымдағы жылдың 20-27 сәуір аралығында Қызылорда қаласында көкпардан ересектер арасында Қазақстан Республикасының чемпионаты өтті. Аталған байрақты бәсекеге 16 облыс пен қалалардан 190 спортшы қатысты, деп хабарлайды «Aulieatanews» ақпараттық агенттігі Жамбыл облысы әкімінің баспасөз қызметіне сілтеме жасап.
Жарыстың топтық іріктеу кезеңінде Жамбыл облысының «Әулиеата» командасы үздік шығып, жартылай финалда Түркістан облысының «Тұран» командасынан 9:2 есебімен басым түсті.
Финалдық кездесуде Алматы облысының көкпаршыларынан 7:1 есебімен жеңіске жетті. Осылайша жамбылдық «Әулиеата» командасы көкпардан Қазақстанның 14 дүркін чемпионы атанды.
Чемпионаттың «Үздік ойыншы» номинациясы жамбылдық Жақсылық Ерғалымға бұйырды.
Айта кетейік, елімізде көкпар спорт түрінен 21 рет Қазақстан Республикасының чемпионаты ұйымдастырылса, оның 14-де «Әулиеата» командасы көш бастап тұр.
