Жамбыл облысында суармалы егіншілікке қажетті инфрақұрылымды жаңарту жұмыстары жалғасып жатыр. Өңірдегі бірқатар суару каналдары кезең-кезеңімен бетонмен қапталып, олардың техникалық жағдайын жақсартуға бағытталған құрылыс жұмыстары жүргізілуде, деп жазады «Aulieatanews» ақпараттық агенттігінің тілшісі.
Жоба Су ресурстары және ирригация министрлігі мен Еуропалық қайта құру және даму банкі арасындағы ынтымақтастық аясында іске асырылуда. Жұмыстардың бір бөлігі негізгі жобалар нәтижесінде үнемделген қаражат есебінен қаржыландырылуда.
Қазір облыста жалпы ұзындығы 85,5 шақырымды құрайтын 14 канал бойынша жаңғырту шаралары қарастырылған. Оның ішінде шамамен 80 шақырымға созылатын «Сәмбет», «Байзақ», «Жамбыл», «Қуат», «Қуат оң жағалауы», «Қуат сол жағалауы», «Исмаил», «Бошақай», «Бошақай-1», «Бошақай-2», «Саза», «Саза төменгі» және «Айтақ» каналдарында құрылыс-монтаж жұмыстары жүріп жатыр.
Мамандардың айтуынша, каналдарды бетондау су жеткізу жүйесінің техникалық жағдайын жақсартумен қатар, суару кезінде болатын ысырапты азайтуға мүмкіндік береді. Бұл әсіресе суармалы жер көлемі үлкен Жамбыл облысы үшін маңызды. Себебі ауыл шаруашылығы алқаптарына суды тұрақты әрі тиімді жеткізу егін өнімділігіне тікелей әсер ететін негізгі факторлардың бірі.
Ирригациялық инфрақұрылымды жаңарту тек қазіргі нысандармен шектелмейді. Байзақ ауданында жалпы ұзындығы 85,3 шақырым болатын 17 каналға қатысты жобалау-сметалық құжаттама әзірленген. Оның бесеуі бойынша құрылыс-монтаж жұмыстарын жыл соңына дейін бастау көзделіп отыр.
Саладағы бұл жұмыстар бірнеше жыл бойы жүзеге асырылып келе жатқан жүйелі жаңғырту бағдарламасының жалғасы саналады. 2019-2025 жылдар аралығында 46 жоба толық аяқталған. Осы жобалар шеңберінде ұзындығы 532 шақырым болатын каналдар реконструкциядан өткізілді.
Су ресурстары және ирригация вице-министрі Жандос Сәлімовтің мәліметінше, биыл бұған дейін басталған тағы бес жобаны аяқтау жоспарланған.
«2019-2025 жылдары 46 жоба аяқталған болатын. Осы жобалар аясында жалпы ұзындығы 532 шақырым болатын каналдарды реконструкциялау жұмыстары жүргізілді. Биыл қолданыстағы тағы бес жобаны аяқтау жоспарланып отыр», – деді Жандос Сәлімов.
Жалпы, Жамбыл облысындағы каналдарды жаңарту жұмыстары өңірдің су шаруашылығы инфрақұрылымын кезең-кезеңімен жаңғыртуға бағытталған. Жобалар толық жүзеге асқан жағдайда суару жүйелерінің техникалық мүмкіндігі артып, ауыл шаруашылығы алқаптарына су жеткізу тиімділігін арттыруға жағдай жасалмақ.
