БҰҰ Бас хатшысы Антониу Гутерриш Халықаралық көші-қон ұйымының (ХКҰ) ізгі ниет елшісі әрі танымал әнші Димаш Құдайбергенмен кездесті, деп хабарлайды «Aulieatanews» ақпараттық агенттігі.
Кездесу Астанада өтіп жатқан ШЫҰ саммиті аясында ұйымдастырылды.
«4 шілдеде ХКҰ Ізгі ниет елшісі ретінде ШЫҰ саммиті аясында Қазақстанға сапармен келген БҰҰ Бас хатшысы Антониу Гутерриш мырзамен кездестім. Көші-қондағы маңызды мәселелерді талқыладық, бұл бағыттағы жұмыстарды қолдайтынымды жеткіздім. Бас хатшы көші-қон саласының маңызды тұстарына тоқталды», деп жазды Д.Құдайберген «Instagram» желісінде.
Антониу Гуттериш Димаштың өнері бүкіл әлем бойынша миллиондаған адамды тәнті еткенін айта кетті.
«Мен өз талантымды әлемдегі оңтайлы өзгерістерге пайдалана алатыныма ризамын. Сондықтан Антониу мырзамен түскен фотосуретті қуана көпшілік назарына ұсынамын», делінген жазбада.
