Қырғызстанның Ош облысы Ноокат ауданында сел ағындары түсіп, бес адам қаза тапты, деп хабарлайды «Aulieatanews» ақпараттық агенттігі.
24.kg арнасына бұл ақпаратты ТЖМ дағдарыс жағдайындағы басқару орталығы басшысының орынбасары Байзақ Оторбеков растады.
— Жергілікті тұрғындарға сілтеме жасап, ол Абшыр-Ата елді мекенінде өзен жағасында алты адам сәкіде демалғанын хабарлады. Барлығын ағын алып кетті. ІІМ қызметкерлері мен жергілікті тұрғындар бес адамның денесін тапты, — делінген материалда.
Қазіргі уақытта ТЖМ қызметкерлері селдің салдарын жою жұмыстарын жүргізіп жатыр, қаза тапқандар мен зардап шеккендердің жеке басы анықталып жатыр.
Жойқын сел 28 маусымда, күннің екінші жартысында Ноокат ауданына түсті. Қатты жаңбырдың салдарынан он ауланы су басып, Абшыр-Ата ауылындағы екі көпірге зақым келді. Тескей-Қожөке ауылында 15 аула мен жергілікті мектеп зардап шекті. Қарабұлақ ауылында балшық ағындары көлік пен көпірді алып кетті. Тәжі-Қыштақ ауылында жеті аула мен бірнеше сарай су астында қалды. Ош-Раззакова автожолындағы көпір бүлінген.
