Жамбыл облысындағы жер сілкінісі: жедел штаб құрылып, тексеру жұмыстары басталды
2025 жылдың 28 наурызына қараған түні Жамбыл облысының бірнеше ауданында жер сілкінісі болды. Табиғи апаттың ең жоғары күші – 5 балл – Меркі ауданындағы Меркі ауылында тіркелді. Т.Рысқұлов ауданының Құлан ауылында дүмпу 4 баллды құраса, Тараз және Шу қалаларында, сондай-ақ Қордай мен Мойынқұм аудандарында – 2 балл деңгейінде сезілді, деп хабарлайды «Aulieatanews» ақпараттық агенттігі.
Оқиға орнына жедел жеткен облыс әкімі Ербол Қарашөкеев Меркі және Т.Рысқұлов аудандарында болып, жағдайды өз көзімен көрді. Сонымен қатар, ол төтенше жағдайлар жөніндегі жедел штабтың отырысын өткізіп, тиісті сала мамандарына тапсырмалар берді.
Зардап шеккендер туралы ақпарат түскен жоқ. Аудандардағы тіршілікті қамтамасыз ету нысандары штаттық режимде жұмыс істеп тұр. Дегенмен, кейбір ғимараттарда зақымданулар анықталды.
Меркі ауданында аудандық орталық аурухана, «Балдәурен» балабақшасы және Талдыбұлақ ауылындағы бір тұрғын үйдің асханасында қабырға жарықтары пайда болған. Т.Рысқұлов ауданының Абай ауылындағы бір үй, Жаңатұрмыс ауылындағы алты баспана, ауылдық мектеп және Қарақыстақ ауылдық округінің Каменка ауылындағы мәдениет үйі де зақымданған нысандар қатарында.
Облыс әкімінің тапсырмасы бойынша арнайы комиссия құрылып, келген шығынды анықтау жұмыстары басталды. Оның құрамына ҚР Төтенше жағдайлар министрлігіне қарасты Сейсмологиялық байқау және зерттеулер ұлттық ғылыми орталығының мамандары енгізілді.
Жер сілкінісі болған аудандарда жағдайды бақылау үшін Меркі ауданында 55 адам мен 33 арнайы техника, ал Т.Рысқұлов ауданында 65 адам мен 40 техника жұмылдырылды. Сонымен қатар, «КАЖсервис» ЖШС облыстық филиалының 25 қызметкері мен 19 техникасы республикалық маңызы бар жолдарды тексеруге кірісті. Мамандар 5 көлік айырығы, 2 теміржол өткелі және 3 көпірдің жай-күйін зерттеді. Жалпы 45 елді мекенде бақылау жүргізілді.
Сонымен қатар, Қазақстанның құзырлы органдары Қырғыз Республикасының Төтенше жағдайлар министрлігімен байланыс орнатып, екі ел шекарасындағы сейсмикалық жағдайға қатысты ақпарат алмасып отыр.
Қазіргі таңда мамандар жер сілкінісінің салдарын толық зерттеуге кірісті. Тиісті шаралар қабылданып, жағдай тұрақты бақылауда.
