Меркі аудан әкімінің орынбасары Мейірхан Өмірбектің төрағалығымен аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті, деп хабарлайды «Aulieatanews» ақпараттық агенттігінің тілшісі.
Жиынға АПБ бастығының бірінші орынбасары А. Майнаусов, аға инспекторы Д.Омарова сонымен қатар білім саласының мамандары, тиісті тұлғалар қатысты. Отырыс барысында бірқатар маңызды мәселелер қаралып, жауапты органдардың есептері тыңдалды.
Комиссия отырысының күн тәртібінде аудандық білім бөліміне қарасты мектепке дейінгі ұйымдарда «Qamqor Tech» ақпараттық жүйесінің енгізілуі және тәрбиеленушілердің сапалы тамақтануын, жұқпалы аурушылдықтың алдын алу іс-шараларын ұйымдастыру мәселелері талқыланды.
Сондай-ақ туыстарының қолында сенімхатпен немесе сенімхатсыз тұрып жатқан балаларды заңды өкілдеріне қайтару бойынша атқарылып жатқан жұмыстарға талдау жасалып, балаларды заңды өкілімен бірге болуды ретке келтіру қажеттігі тапсырылды.
Жасөспірімдер арасындағы құқықбұзушылықтардың алдын алу шаралары қарастырылып, мектеп психологтарының оқушыларды алаңдатқан мәселелерді анықтау және қажетті психологиялық көмек көрсету тәжірибесі баяндалды.
Комиссия отырысында тиісті сала мамандары баяндама жасап, балалардың құқықтарын қорғау бағытындағы өзекті мәселелерді ортаға салды. Жиын соңында комиссия тарапынан нақты тапсырмалар беріліп, бұл бағыттағы жұмыстарды жүйелі түрде жалғастыру керектігі айтылды. Кәмелетке толмағандардың қауіпсіздігі мен құқықтарын қорғау – біздің басты міндетіміз!
