Оқу-ағарту министрі Жұлдыз Сүлейменова БЖБ және ТЖБ сынақтарын алып тастауға байланысты оқушылардың білімін бағалаудың жаңа тәртіптері енгізілетінін мәлімдеді, деп хабарлайды «Aulieatanews» ақпараттық агенттігі.
Министрдің сөзінше, бастауыш сынып оқушыларының білімін бағалауда дәстүрлі жазба жұмыстарына қайта басымдық беріледі. Атап айтқанда, қазақ тілінен диктант, мазмұндама, шығарма және басқа да шығармашылық жұмыстар, ал математикадан бақылау жұмыстары қайта енгізіледі.
«Сонымен қатар оқушының дәптері де бағалаудың бір бөлігіне айналады. Бұдан былай балалар тапсырмаларды арнайы ақ парақтарға ғана орындамай, дәптерге жазып орындайды. Мұғалімдер оқушылардың дәптерлерін тексеріп, олардың жұмысына баға қояды», деді Жұлдыз Сүлейменова.
Министрдің айтуынша, қазір аталған жұмыстарды бағалау критерийлері әзірленіп жатыр. Оларды Ыбырай Алтынсарин атындағы Ұлттық білім академиясында құрылып жатқан арнайы жаңа бөлім айқындайды.
Сондай-ақ жаңа оқу жылынан бастап бастауыш сыныптардың бағалау жүйесінен модерация ұғымын алып тастау жоспарланып отыр. Жұлдыз Сүлейменованың айтуынша, мұндай шешім мұғалімдердің жүктемесін азайту мақсатында қабылданған.
«Бұған дейін модерацияның формалды түрде жүзеге асырылып, мұғалімдерге шамадан тыс жүктеме бергенін көріп отырмыз», деді ол.
