Жуалы ауданында биыл көктемгі дала жұмыстарына шаруалар ерте қамданған. Ауданның ауылшаруашылығы бөлімі басшысының айтуынша, шаруалар көктемгі егіс науқанына қажетті барлық жұмыстарды жүйелі жүргізуде. Әдетте, көктемгі кезең шаруалар үшін арпа мен басқа да дақылдарды себуге өте қолайлы. Осы жылы ауданның егістік жерлерінде егіншілікті дамыту мақсатында ауқымды жұмыстар қолға алынған, деп жазады «Aulieatanews» ақпараттық агенттігінің тілшісі.
Аудан әкімдігі ауылшаруашылығы бөлімінің басшысы Ержан Серкебаевтың айтуынша, аудан аумағында жалпы 216306 гектар ауылшаруашылығы жері бар. Оның ішінде егістік жерлері – 95449 гектар, шабындық – 2 046 гектар, жайылым жері – 109439 гектар, көпжылдық екпелер – 265 гектар, ал қосалқы егістіктер – 2128 гектарды құрайды.
«Мемлекет басшысы аграрлық секторды дамытуға үлкен көңіл бөліп отыр. Осыған орай биылғы жылға арналған жұмыс көлемі айтарлықтай ауқымды. 10300 гектарға күздік дақылдар себілді. Сонымен қатар, көктемгі дала жұмыстарына дайындық барысында 45620 гектар жер сүдігер көтерілді. Биыл 95449 гектар жерге егін және көкөніс орналастыру жоспарланып отыр. Бұдан бөлек, 11 мың тонна минералды тыңайтқыштарды егістік жерлерге енгізу көзделген. Шаруа қожалықтары үшін 2300 тонна дизель отыны бөлініп, техникаларға қолдау көрсетілмек», – дейді Ержан Байзақұлы.
Сонымен қатар, өңірде ауылшаруашылығы науқанына қажетті дизель отынын таратушы оператор ретінде жергілікті «Аққайың» серіктестігі бекітілген. Бөлім басшысы жергілікті шаруалардың «Госагро» порталы арқылы дизель отыны мен басқа да мемлекеттік жеңілдіктерге қол жеткізу мүмкіндігі бар екенін атап өтті. Бұған қоса, «ҚазАгроҚаржы» акционерлік қоғамы арқылы ауылшаруашылығы техникаларын 5 пайыздық мөлшерлемемен сатып алуға болады. Сонымен қатар, «Кең дала-1», «Кең дала-2» бағдарламалары және «Аграрлық несие корпорациясы» мен «Жуалы» несие серіктестігі арқылы жеңілдетілген несиелер алуға да мүмкіндіктер бар.
Биылғы жыл үшін масақты дәнді дақылдарды егу жоспары бойынша 54956 гектар жер дайындалған. Бұл көрсеткіш өткен жылдан 1440 гектарға артық. Яғни, аудан бойынша егіс алқабының көлемі жыл сайын ұлғайып келеді. Атап айтқанда, биыл 28510 гектарға жаздық арпа, 17960 гектарға майлы дақылдар, 4500 гектарға көпжылдық шөп, 2494 гектарға картоп, 650 гектарға көкөніс, 130 гектарға дәндік жүгері, 12 гектарға бақша дақылдары және 700 гектарға сүрлемдік жүгері егіледі.
Қазіргі таңда көктемгі дала жұмыстары ауданның барлық округтерінде басталып кеткен. Шаруа қожалықтары өз күштерімен 595 гектар жер жыртып, 3870 гектар жерді өңдеді. Ал, 1220 гектар алқапқа дән себіліп, жұмыстар жалғасын табуда.
Жуалы ауданындағы көктемгі дала жұмыстары мен агросаладағы барлық шаралар жүйелі түрде жүргізілуде. Бұл ауылшаруашылығының дамуына және шаруалардың әл-ауқатын жақсартуға үлкен әсер ететін маңызды қадам.
