Талас ауданында 2025 жылғы көктемгі егіс науқаны басталып, ауылшаруашылығы саласында жүйелі жұмыстар атқарылуда. Биыл жалпы 12145 гектар алқапқа әртүрлі ауылшаруашылығы дақылдарын егу жоспарланған. Оның ішінде 4500 гектарға күздік бидай себілсе, алдыңғы жылдары егілген көпжылдық шөп көлемі 4125 гектарды құрайды, деп жазады «Aulieatanews» ақпараттық агенттігі.
Көктемгі дала жұмыстары аясында 3520 гектар жерге ауылшаруашылығы дақылдары себілмек. Атап айтқанда: 1050 гектар жаздық арпа, 495 гектар дәндік жүгері, 350 гектар мақсары, 10 гектар күнбағыс, 100 гектар картоп, 140 гектар қант қызылшасы, 275 гектар бақша өнімдері, 190 гектар көкөніс және 910 гектар көпжылдық шөп егу көзделуде. Қазіргі таңда 1950 гектар жер жыртылып, 350 гектар алқапқа көпжылдық шөп себілді.
Науқанды сапалы әрі уақытылы өткізу үшін 130 тонна арзандатылған дизель отынына өтінім беріліп, оператор арқылы шаруаларға литрі 254 теңгеден таратылуда. Сондай-ақ көктемгі егіс жұмыстарына 439 бірлік ауылшаруашылығы техникасы толықтай дайындалды.
Егіс жұмыстарын қаржылай қолдау мақсатында «Кең дала» бағдарламасы шеңберінде екі шаруашылыққа 20 миллион теңге көлемінде несие берілді. Бұдан бөлек, 325 гектар алқапқа тамшылатып және жаңбырлатып суару технологияларын енгізу жоспарланған.
Ауыл еңбеккерлері көктемгі дала жұмыстарын жоғары жауапкершілікпен атқарып, алдағы өнім көлемін арттыруға күш салып жатыр.
