«Мал баққанға бітеді» деген халық даналығы Халид Надаровтың өмірімен тікелей байланысты. Ол атадан қалған кәсіпті жалғап, бүгінде мал шаруашылығын табысты жүргізіп отырған ауыл кәсіпкерлерінің бірі. Талас ауданы, Қараой ауылында орналасқан «Малика» шаруа қожалығы қазіргі таңда 600-ден астам уақ мал, 10 сиыр және 10 жылқы өсіріп отыр, деп жазады «Aulieatanews» ақпараттық агенттігінің тілшісі.
Халид Асанұлы бала кезінен малдың жайын біліп өскен. Әкесі Асан 1977 жылы осы жерге қоныстанып, бүкіл ғұмырын мал шаруашылығына арнаған. Тәжірибелі шопан 100 саулықтан 200-ден астам төл алып, өз ісінің шебері атанған. Осындай еңбексүйгіштік қасиет балаларына да дарыды. 2015 жылы Халид Асанұлы жеке қожалығын ашып, аз малмен басталған кәсіпті біртіндеп кеңейтті.
Қазіргі заманғы технологиялар шаруашылыққа үлкен көмек көрсетуде. Қожалық мемлекеттік бағдарламалардың арқасында құдық қаздырып, күннен қуат алатын электр қондырғысын орнатқан. Соның нәтижесінде су мәселесі шешіліп, жарық та тұрақты беріліп отыр.
– Қазір қыстың суығында да, жаздың аптабында да жағдайымыз жақсы. Тіпті, электр қондырғысына тоңазытқыш, теледидар да қосып отырмыз, – дейді Халид Асанұлы.
Отанасы Малика Темірова да үй шаруасымен қатар, қожалық жұмысына көмектеседі. Сүт, айран, май, қаймақ өндіріп, Қаратау қаласында сатады.
– Бұл кәсіп маған таңсық емес. Келін болып түскеніме 40 жыл болды. Осы уақыт ішінде талай қиындық көрдік, бірақ мойымадық. Мал шаруашылығы – еңбекқорлықты талап ететін сала, – дейді ол.
Қазіргі таңда малшы табу – үлкен қиындық. Көптеген адамдар тұрақты жұмыс істегісі келмейді, ал талаптары жоғары. Дегенмен, Халид Асанұлы жұмысшыларға барынша жағдай жасап отыр. Малшыларға тұрақты жалақы төленіп, азық-түлікпен қамтамасыз етіледі.
Шаруашылықтың болашағы – жастардың қолында. Бірақ, өкінішке қарай, бұл салаға қызығушылық танытатындар аз.
– Жастар мал шаруашылығына көбірек ден қойса, елдің тұрмысы да түзелер еді. Балама кәсіптің қыр-сырын үйретіп келемін. Қолдағы малға біз кеткен соң қарайтын – солар, – дейді Халид Асанұлы.
Алдағы уақытта «Малика» шаруа қожалығы мал басын көбейтуді, жайылым жерлерді кеңейтуді жоспарлап отыр. Шаруа иесінің айтуынша, ең бастысы – еңбек етуге деген ниет пен жауапкершілік болса, кез келген істің берекесі болады.
Мал шаруашылығы – машақаты көп, бірақ табысы мол кәсіп. Халид Асанұлының тәжірибесі соны дәлелдеп отыр.
