Жамбыл ауданында ауылшаруашылығы саласы қарқынды дамып келеді. Аудан әкімдігінің мәліметінше, мұнда өндірілген жалпы өнімнің 50 пайыздан астамы мал шаруашылығына тиесілі. Мемлекеттік қолдаулар мен жаңа технологиялардың енгізілуі ет, сүт және жұмыртқа өндірісін арттыруға айтарлықтай ықпал етуде, деп жазады «Aulieatanews» ақпараттық агенттігінің тілшісі.
Ауданда жалпы құны 4,7 миллиард теңгені құрайтын екі ірі тауарлы сүт фермасының құрылысы жүргізіліп жатыр. Бұл жобалар Өрнек және Көлқайнар ауылдық округтерінде іске асырылуда. Олар толық іске қосылған кезде 50 жаңа жұмыс орны ашылады, оның 30-ы тұрақты жұмыс орындары болмақ.
Өрнек ауылында салынып жатқан «Момбеков» шаруа қожалығының тауарлы сүт фермасы 621 басқа арналған. Жобаның жалпы құны – 2,9 миллиард теңге. Қазіргі таңда фермаға электр желілері тартылып, негізгі құрылыс жұмыстары жүргізілуде.
Шаруашылық басшысы Күлпаршын Сатибаеваның айтуынша, ферма заманауи технологиялармен жабдықталады және өндіріс толық автоматтандырылған жүйеде жұмыс істейтін болады.
Көлқайнар ауылдық округінде «AzNur Agro» ауылшаруашылығы өндірістік кооперативінің 400 басқа арналған тауарлы сүт фермасының құрылысы жүргізілуде. Жобаның құны – 1,8 миллиард теңге.
Кооператив төрағасы Азат Сатановтың айтуынша, құрылыс жұмыстары жоспарға сай жүріп жатыр және сәуір айында толық аяқталады деп күтілуде.
Аудан әкімінің айтуынша, бұл жобалар іске қосылғаннан кейін аймақта сүт өндірісі артып, жаңа жұмыс орындары ашылады.
– Мал шаруашылығын дамыту – біздің басты басымдықтарымыздың бірі. Суармалы алқаптардың аумағын кеңейту, ауылшаруашылығы техникаларын жаңарту, асыл тұқымды мал басын көбейту және «ақылды фермалар» жүйесін енгізу арқылы өңір экономикасын жаңа деңгейге көтереміз, – дейді аудан басшысы.
Жаңа фермалардың ашылуы аймақтағы ауылшаруашылығы саласына тың серпін беріп, мал шаруашылығын цифрландыру арқылы оның өнімділігін арттыруға ықпал етпек.
