Жасөспірімдер арасындағы қылмыстың жылдан-жылға артып келе жатқаны қоғамды алаңдатпай қоймайды. Өткен жылы Байзақ ауданында 5, Жуалыда 3, Қордайда 2 қылмыс жасөспірімдердің қатысуымен орын алды. Көп жағдайда олар ұрып-соғу, ұрлық сияқты әрекеттерге барады. Мұндай оқиғалардың жиілеуі балалардың қылмысқа бейім болуының негізгі себептерін талдауды қажет етеді, деп жазады «Aulieatanews» ақпараттық агенттігінің тілшісі.
Жасөспірімдер қылмысының алдын алу мәселесі кәмелетке толмағандардың істері және олардың құқықтарын қорғау жөніндегі комиссияның кеңейтілген отырысында қаралды. Басқосуда облыстық білім басқармасы, полиция департаментінің кәмелетке толмағандар ісі жөніндегі бөлімшесі, психологиялық қолдау орталығы өкілдері мен аудан әкімдерінің орынбасарлары баяндама жасады.
Құзырлы органдар тарапынан жасөспірімдер арасындағы құқықбұзушылықтың алдын алу мақсатында бірқатар жобалар жүзеге асырылуда. Мәселен, республикалық деңгейде «KiVa», «ДосболLIKE», облыстық деңгейде «Бестерек», «Komek Stop Bullying», «HR+» автоматтандырылған психологиялық-педагогикалық мониторинг жүйесі және «Кел, дос болайық!» жобалары іске қосылған. Соған қарамастан, мектепішілік есепке алынған оқушылар саны артып келеді: 2023 жылы 395 бала тіркелсе, былтыр 490-ға жетті. Ал биыл бұл көрсеткіш 587 оқушыны құрады. Бұған қоса, өңірде 140 жасөспірім мен 262 қолайсыз отбасы бар.
Статистикаға сәйкес, жасөспірімдер қылмысының 80 пайызы мектептен тыс уақытта орын алады. Бұл – ата-аналардың жауапкершілігін күшейту қажеттігін көрсетеді. Отбасыдағы бақылаудың әлсіздігі, мектептен тыс ортаның теріс ықпалы мен тәрбие жұмысының жеткіліксіздігі балалардың қылмыс жасауына себепші факторлар болып отыр.
Жастардың қателікке ұрынбауы үшін құқық қорғау органдары ғана емес, бүкіл қоғам жауапты. Бұл мәселені шешуде ата-аналар, мұғалімдер, қоғамдық ұйымдар мен жергілікті әкімдіктер бірлесіп жұмыс жүргізуі қажет. Өскелең ұрпақтың болашағына бейжай қарамай, оларды дұрыс жолға бағыттау – баршамыздың ортақ міндетіміз.
