Жамбыл облысында «Әулиеата – кітап оқитын өңір» жобасы аясында өткізілген «Ой шебері» зияткерлік ойынында жеңімпаз атанған оқушыларға марапаттар тапсырылды. Бұл шарада өңір басшысы кітап оқудың маңыздылығын атап өтіп, жасөспірімдерді білімге деген құштарлықтарын арттыруға шақырды, деп хабарлайды «Aulieatanews» ақпараттық агенттігі.
Жеңімпаздарға облыс әкімінің Алғысхаты мен қазақ әдебиетінің классигі М. Әуезовтің «Абай жолы» романы сыйға тартылды.
Айта кетерлігі, 18 қаңтарда өткен білім сайысына 450 оқушыдан құралған 90 команда қатысты. Олар өңірлік ақын-жазушылардың шығармаларына байланысты сұрақтарға жауап беріп, білімдерін көрсетті. Байзақ, Меркі, және Сарысу аудандарының оқушылары жүлделі орындарға ие болып, қаржылай сертификаттармен марапатталды.
Сайыста 300 кітап оқыған Асқар Нұрмахан, 250 өлең жатқа білетін Кәусар Қашқынбай, 100-ден астам кітаптың мазмұнын меңгерген Нұртілеу Сатыбалды сынды талантты жастар ерекше көзге түсті.
