Тараз қаласында Ұлыстың ұлы күні биыл ерекше сән-салтанатпен және ауқымды түрде атап өтілді. Мереке ұлттық дәстүрлерді насихаттайтын түрлі шаралармен, киіз үйлермен, спорттық ойындармен және концерттік бағдарламамен жалғасын тапты. Бұл туралы «Aulieatanews» ақпараттық агенттігі хабарлайды.
Қаланың Орталық алаңында оннан астам киіз үй орнатылып, ұлттық қолөнер жәрмеңкесі ұйымдастырылды. Келушілерге наурыз көже, бауырсақ және басқа да ұлттық тағамдар ұсынылды. Сонымен қатар, асық ату, арқан тарту, қазақ күресі сияқты ұлттық спорт ойындары өтіп, алтыбақан айналасында жастар мерекелік көңіл күйге бөленді.
Іс-шараға Жамбыл облысының әкімі Ербол Қарашөкеев қатысып, тұрғындарды Наурыз мерекесімен құттықтады. Мерекелік концертте «Жігіттер» квартеті, «Қоңыр» тобы және Қырғызстанның халық әртісі Саламат Садыкова өнер көрсетіп, көрермендерді әсем әнмен сусындатты. Жергілікті өнерпаздар да ұлттық ән-күй мен билермен мерекенің шырайын арттырды.
