Еліміздегі аграрлық секторды дамыту – Мемлекет басшысының басты назарындағы мәселелердің бірі. Президенттің Қазақстан халқына арнаған Жолдауында ауылшаруашылығын өркендетуге бағытталған бірқатар маңызды бастамалар көтерілді. Соның ішінде «Тауарлы несие» жобасы ерекше орын алады. Бұл бастама ауыл кәсіпкерлеріне қаржылай емес, тауарлық қолдау көрсетіп, ауылшаруашылығын дамытуға серпін беруді көздейді, деп хабарлайды «Aulieatanews» ақпараттық агенттігінің тілшісі.
Қазіргі таңда бұл жоба Меркі ауданында өз жемісін бере бастады. Аталған жоба аясында Меркі ауданындағы «Жалын» шаруа қожалығының жетекшісі Гаухар Омарова ауылдасы Ержан Ошақбаевқа 50 бас саулық қой мен 2 қошқарды бөліп берді. Бұл – ауыл тұрғындарының өзара ынтымақтастығының, қолдау көрсету арқылы шаруашылықтың дамуына үлес қосуының айқын көрінісі.
«Тауарлы несие» шарты бойынша Ержан Ошақбаев бес жыл бойы жыл сайын төлдің 50 пайызын Гаухар Омароваға қайтарып отырады. Ал жоба мерзімі аяқталған соң, яғни бес жылдан кейін, барлық 50 саулық қой мен қошқар толығымен Ержанның жеке меншігіне өтеді. Бұл жүйе шаруалардың өз ісін дамытуына мүмкіндік беріп қана қоймай, ауылдағы мал шаруашылығының көкжиегін кеңейтеді. «Тауарлы несие» жобасы ауылшаруашылығының дамуына ғана емес, ауыл халқының әл-ауқатын арттыруға да ықпал етеді. Себебі, мал басының көбеюі жергілікті өнім өндірісінің артуына, сонымен қатар тұрақты табыс көзінің қалыптасуына жол ашады. Бұл жүйе ауыл тұрғындарының кәсіпкерлікке деген қызығушылығын арттырып, ауыл экономикасын нығайтуға айтарлықтай әсер етеді.
Қазіргі таңда мұндай жобалар республика бойынша қарқынды жүзеге асырылуда. Алдағы уақытта ауылшаруашылығын одан әрі жетілдіру мақсатында осындай игі бастамалардың санын арттыру көзделіп отыр. Тауарлы несие беру тәжірибесі ауыл кәсіпкерлері үшін жаңа мүмкіндіктер ашып, ауылшаруашылығының тұрақты дамуына кепілдік бермек.
