Шу ауданының тұрғындары мен қонақтары асыл тұқымды қошқардың көрмесіне куә болды. 200-ден астам асыл тұқымды қошқары таныстырылған іс-шараға ветеринария басқармасының басшысы Бақыт Бетбаев, аудан әкімі Бақытжан Жәнібеков және қой шаруашылығын сүйетін ауыл тұрғындары қатысты, деп хабарлайды «Aulieatanews» ақпараттық агенттігінің тілшісі.
Көрме барысында бірнеше байқаулар ұйымдастырылды. Оның бірі 110 келілік қошқар көтеру сайысы болды. Түркістан облысынан келген Құттыбай Сарыбаев бұл сайыста жеңімпаз атанып, қошқарды 33 рет көтеріп, бас жүлдеге ие болды. Бірлікүстем ауылының тұрғыны Кенже Қожи 16 рет көтеріп, екінші орынды еншіледі. Далақайнарлық Данияр Шәкіров 15 рет көтеріп, үздік үштікті түйіндеді. Барлық жеңімпаздарға қаржылай сертификат табысталды.
Сонымен қатар, қой қырқу сайысы өткізіліп, қатысушылар шапшаңдық пен ептіліктерін көрсетті. Іс-шараның соңында қойды жіліктеу жарысы ұйымдастырылды, ал үш қойдың еті қайырымдылыққа жұмсалды.
Асыл тұқымды қой көрмесінде ауылшаруашылығы өнімдерінің жәрмеңкесі де өтті. Ет, сүт өнімдері мен «Ауыл аманаты» бағдарламасы аясында кәсіп бастаған азаматтардың тауарлары нарық бағасынан төмен бағамен сатылды.
Айта кету керек, Жамбыл облысында 1700-ден астам шаруа қожалығы тіркелген, ал өңірде жалпы саны 3,5 миллион қой бар.
