Семейде Абайдың 180 жылдық мерейтойы аясында 180 баланың тұсауы кесілді

Наурыз мерекесіне орай, Абай облысында Ұлы Абайдың 180 жылдық мерейтойы аясында бір уақытта 180 бала жаңа өмірге қадам басты. Семей қаласында аймақ басшысы зиялы қауым өкілдері, мәдениет, білім, спорт, кәсіпкерлік салаларының мамандарымен бірге 40-қа жуық бүлдіршіннің тұсауын кесу рәсімін өткізді, деп хабарлайды «Aulieatanews» ақпараттық агенттігі.

22 наурыз күні облыс бойынша түрлі мерекелік іс-шаралар ұйымдастырылып, Семей қаласының барлық аудандарында Наурызды кең көлемде атап өту үшін арнайы бағдарлама дайындалды. Орталық алаңда қолөнер көрмелері, ұлттық ойындар мен спорттық жарыстар, фотоаймақтар қойылып, қала тұрғындары мен қонақтарына ерекше көңіл күй сыйлады.

Мерекелік шараның ең маңызды оқиғаларының бірі композитор Нұрғиса Тілендиевтің 100 жылдығына арналған концерт болды. Жүз домбырашы бір мезгілде Тілендиевтің шығармаларын орындап, кешті музыка мен тарихи мазмұнға толы ерекше атмосфераға айналдырды.

Қала тұрғындары мен қонақтары орталық алаңда қазақстандық эстрада жұлдыздарының өнерін тамашалады. «Алашұлы», «МузАрт» тобы және Ә. Қашаубаев атындағы мемлекеттік филармониясы мен қалалық мәдениет сарайының әншілері өз өнерін көрсетіп, көрермендерге тамаша көңіл күй сыйлады.

Кешкі бағдарлама аясында «Алашұлы» тобы, «Әдемі-ай» дуэті мен Қайрат Нұртас және жергілікті өнерпаздар да өз өнерлерін паш ететін болады.