Меркі ауданында ауылшаруашылығы саласындағы өзекті мәселелерді талқылау мақсатында шаруа қожалықтарының иелерімен кездесу өтті. Жиынға аудан әкімінің орынбасары Қайрат Арғымбаев төрағалық етті. Сондай-ақ, Несиелендіру департаментінің бас маманы Нұржігіт Мәукенов, Аграрлық несие корпорациясының өкілі Нұрлан Әлімбаев, Ауылшаруашылығы басқармасының өкілі Әсел Бақытқызы және «ҚазАгроҚаржы» АҚ өкілі Әділет Нуралиев қатысты, деп хабарлайды «Aulieatanews» ақпараттық агенттігінің тілшісі.
Жиын барысында Қайрат Рахымбайұлы мемлекет тарапынан көрсетілетін қолдаулар туралы жан-жақты баяндап, ауылшаруашылығын дамытуға бағытталған бағдарламалар мен субсидиялау тетіктеріне тоқталды. Қаржы ұйымдарының өкілдері шаруаларға жеңілдетілген несие беру мүмкіндіктерін, екінші деңгейлі банктер арқылы қаржыландыру көздерін және «ҚазАгроҚаржы» АҚ-ның ауылшаруашылығы техникасын лизингке беру шарттарын түсіндірді.
Кездесуге қатысқан шаруа қожалықтарының иелері сала мамандарына көкейдегі сұрақтарын қойып, нақты жауаптар алды. Мамандар өз кезегінде шаруаларды барынша қолдауға дайын екендерін жеткізіп, қаржыландыру тетіктеріне қатысты кеңестер ұсынды. Мұндай кездесулер ауылшаруашылығын дамытудағы түйткілді мәселелерді шешуге, шаруаларға мемлекет тарапынан көрсетілетін қолдау шараларын тиімді пайдалануға мүмкіндік береді.
