Ұрпақтар сабақтастығының маңызы зор, өйткені, ол аға буынның жылдар бойы жинаған тәжірибесі мен білімін жастарға жеткізуіне мүмкіндік береді.
Тараз қаласындағы әскери госпитальде жақсы бір дәстүр қалыптасқан: мұнда Жамбыл жоғары медициналық колледжінің студенттері тәжірибеден өтеді. Бұл әскери ведомство мен білім беру мекемелері арасындағы тығыз ынтымақтастықтың нәтижесінде мүмкін болды, деп хабарлайды «Aulieatanews» ақпараттық агенттігінің тілшісі.
Әскери дәрігерлер мен болашақ медицина мамандары арасындағы мұндай өзара әрекеттестік өте пайдалы. Студенттер армия жайлы көбірек білуге мүмкіндік алады, әскери медицина қызметінің қалай ұйымдастырылатынын өз көздерімен көреді. Ең бастысы – осындай тәжірибеден кейін көптеген жастар медициналық жоғары оқу орындарында білімін жалғастырып, болашақта әскери дәрігер болуды мақсат етеді.
Болашақ фельдшерлер үшін бұл – тәжірибелік дағдыларды шыңдаудың тамаша мүмкіндігі, ал әскери дәрігерлер үшін – көмекшілер тауып қана қоймай, өздерінің лайықты ізбасарларын тәрбиелеу жолы. Осы мақсатта госпиталь бастығы, медицина қызметінің подполковнигі Рафиқ Гусейнов студенттермен кездесулер өткізіп, ал хирургия бөлімінің бастығы, медицина қызметінің майоры Бегәлі Тілеген студенттермен бірге таңғы аралау жүргізеді. Ол болашақ медицина қызметкерлерімен науқастардың жағдайын талқылап, нақты мысалдар арқылы қандай әдістер мен іс-әрекеттер жасау керектігін тәжірибе жүзінде көрсетеді.
Студенттермен кездесулерді мазмұнды әрі қызықты өткізуге терапия бөлімінің бастығы, медицина қызметінің подполковнигі Бахромжан Тәжібаев пен оның әріптесі, медицина қызметінің майоры Әбділла Сауленбеков те ерекше көңіл бөледі.
Дәрігерлер мен студенттердің пікірінше, осындай бірлескен тәжірибелік оқыту жобасы білім беру мен әскери медицинаның байланысын нығайтып қана қоймай, жас мамандар үшін жаңа мүмкіндіктер мен көкжиектер ашады. Бәлкім, болашақта олар әскери медицина саласына қосылып, осы әскери госпитальде алған тәжірибелері кәсіби тұрғыда үлкен пайдасын тигізер. Нәтижесінде, олар жоғары білікті маман болып қалыптасады.
